Азербайжандын президенти Илхам Алиев Украинаны Орусия ээлеп алган аймактарынан баш тартпоого чакырды. Бул тууралуу ал Шуша шаарындагы медиафорумда украиналык журналист Дмитрий Гордондун суроосуна жооп берип жатып айтты. Алиев 30 жылдан бери Тоолуу Карабак жана ага жакын аймактардын бир бөлүгүн Баку көзөмөлдөбөй калган Азербайжан менен Украинадагы кырдаалды салыштырды.
Кавказдагы эки өлкө Тоолуу Карабак маселесинен улам 30 жылдан ашуун жаңжалдашып келди. Азербайжан 2023-жылы сентябрда аймакты өз карамагына толук алгандан кийин ортодогу атышуу дээрлик токтогон. Ал жакта жашаган армян улутундагы 100 миңдей киши үй-жайын таштап чыгып кетүүгө мажбур болгон.
"Сүйлөшүүлөр жүргөн жылдарда... Мен ага 2003-жылдын аягынан тарта катышып келем. 17 жылдан бери көптөгөн сунуштар болду, көптөгөн жолугушуулар болду. Реалдуу жагдайды карап тил табышуу зарылчылыгы тууралуу көп билдирүүлөр болду. Андан кийин жаңы реалдуулуктарды биз жаратабыз, силер ага макул болосуңар деп чечтик. Мына ушундай болду", - деп белгиледи Алиев.
Азербайжан Украинанын аймактык бүтүндүгүн колдой турганын ачык билдирип келатат.
Буга чейин Баку орус тышкы иштер министри Сергей Лавровдун Карабакты талаштуу аймак деп атаганына нааразы болгон.
Шушада сүйлөп жатып Алиев Азербайжан былтыр кышында Азербайжан аба жолдору (AZAL) компаниясынын учагы кырсыкка учураган жагдай боюнча эл аралык сотко кайрылуу үчүн документтерди даярдап жатканын билдирди.
Компаниянын учагы былтыр 25-декабрда кырсыкка учураганда Азербайжандын бийлиги лайнер Грозныйга отурар маалда орусиялык ракетадан коргонуу системасынын актылоосуна кабылганын айтууда. Жүргүнчү учак Казакстандын Актау шаарына бет алууга аргасыз болуп, ошол жакта кулаган.
Борттогу 67 адамдын 38и каза болуп, калганы аман калган.
Европа Биримдигине мүчө мамлекеттердин тышкы иштер министрлери Орусияга каршы бекиткен 18-санкциялык пакетке кимдер киргени белгилүү болду. Документ ЕБнын кабыл алынган мыйзамдарды жарыялаган расмий сайтына жарыяланды. Анда чектөөлөргө дуушар болгон орусиялык банктардын тизмеси, көмүскө флот деп аталган кемелердин, жеке жана юридикалык жактардын тизмеси камтылган.
Санкциялар пакетине кирген 22 банктын тизмесине Т-Банк (мурдагы Tinkoff), Яндекс банк, Ozon банк жана мамлекеттик ипотекалык Dom.rf банкы кирген. “Осторожно новости” басылмасы белгилегендей, тизмеде Казандын “Банк 131” банкы дагы кирген. Ал Telegramда @donate боту аркылуу кайрымдуулуктарды чогултуу үчүн колдонулган. Аны ишкер Дмитрий Еремеев негиздеген. The Bell басылмасынын жазганына караганда, ал буга чейин Телеграммдын негиздөөчүсү Павел Дуров чыгарууга аракет кылып жүргөн Toncoin криптовалютасынын инвестору. Mediazona жазгандай, Еремеев банктын капиталынан чыкканын билдирди.
Санкциялык чектөөгө мындан сырткары орусиялык 23 компания, анын ичинде Орусиянын түз инвестициялар фонду, Аскердик өнөр жай комплекси менен байланыштуу делген бир катар ишканалар илинди.
Алардын арасында Новосибирскидеги “Коминтерн” заводу, Москвадагы “Системотехника”, жарым өткөргүч приборлор илим-изилдөө институту, Смоленскидеги “Химинтехно”, “Полихим” жана башка заманбап электр байланыш технологиялары илим-изилдөө институту бар.
Евробиримдиктин өкүлдөрүнүн айтымында, тизмеде Кытай, Гонконг, Түркия, БАЭ, Маврикий жана Сингапур сыяктуу үчүнчү өлкөлөрдүн бир катар компаниялары жана орусиялык мунай продуктуларын ташуу менен алектенген 100гө жакын танкерлер бар.
Санкцияга кабылган адамдардын тизмесине “Мосфильмдин” башкы директору, режиссер жана саясий ток-шоунун катышуучусу Карен Шахназаров, Крым университетинин ректору Владимир Курянов, Аймактарды өнүктүрүү фондунун мурдагы жетекчиси Ильшат Шагиахметов, аскердик -өнөр жай комплексине байланышы бар делген бир катар ишкерлер, чет элдик жарандар кирди.
Европа Биримдигине мүчө мамлекеттердин тышкы иштер министрлери 18-июлда Орусияга каршы санкцияларын 18-пакетин бекиткен.
Шаркеттин тышкы иштер боюнча жогорку өкүлү Кая Каллас бул чаралар бүгүнкү күнгө карата Москвага салынган "өтө катаал санкциялар" болорун билдирген. Reuters агенттиги Каллас Европа Биримдиги Украинанын колдоодон баш тартпасын, Москвага согушту токтотмоюнча кысымды күчөтө берерин айтканын жазган.
Москва Еврошаркеттин санкцияларын "мыйзамсыз" деп атаган. Кремлдин басма сөз катчысы Дмитрий Медведев Орусияны колдогон өлкөлөргө бул терс кесепеттерин тийгизерин белгилеген.
Орусия Украинага каршы согуш ачкандан бери фронтто 119 154төн кем эмес орус аскери каза болгон. Мындай сандар Би-би-си орус кызматы менен “Медиазона” басылмасынын ыктыярчылар менен биргелешип даярдаган маалыматында айтылат.
Тизме соцтармактардагы маалыматтар, жергиликтүү басылмалардагы кабарлар сыяктуу ачык булактардын негизинде түзүлгөн. Каза болгондордун реалдуу саны мындан бир кыйла көп болушу мүмкүн.
Мурунку маалымат жарыялангандан кийинки эки жумада каза тапкандардын саны дээрлик миң кишиге көбөйгөн.
Эң көп жоготуулар ыктыярчылар арасында болгон – согуш башталгандан бери 32 миңден ашуун киши өлгөн. Каза болгондордун саны боюнча экинчи орунда абактан баргандар (дээрлик 18 миң киши), үчүнчүдө – мобилизациялангандар (13 миңден ашуун) турат.
Согушта жалпы каза болгондордун беш миңден ашууну офицерлер.
Мурдараак АКШнын Мамлекеттик катчысы Марко Рубио Орусия жыл башынан бери 100 миң аскеринен айрылганын билдирген. Ушундай эле бааны 14-июлда НАТОнун баш катчысы Марк Рютте да берген.
“Медиазонанын” ырасташынча, согушчул блогер Павел Губарев согуштун башынан тарта жалпысынан миллион аскер каза болгон деп эсептейт.
Америкалык Стратегиялык жана эл аралык изилдөөлөр борборунун эсебинде, Орусия согуш башталгандан бери миллион кишисинен айрылган. Анын 250 миңи өлтүрүлгөн. Украинанын жалпы жоготуулары 400 миң аскер деп эсептелет.
Орусия менен Украина өздөрүнүн жоготуулары тууралуу расмий түрдө өтө сейрек кабарлашат.
«Шереметьеводо» учууларга убактылуу тыюу салынды
Росавиация Москванын бул аэропортунда учууларга убактылуу тыюу салынганын 19-июлга караган түнү жарыялады.
18-июлдун кечинде «Домодедово» аэропортунда коопсуздуктан улам ушундай эле чектөөлөр киргизилген.